• Ramasedi
Lena lebitso le hlalosa hore ya re okametseng o fana ka lesedi. E leng hore ke yena ya re kgantshetsang ditsela.
• Mmopi
Lena lebitso le hlalosa hore ya re okametseng ke yena mmopi wa tsohle tse lefatsheng.
• Modimo
Modimo e hlalosa ya hodimo. Bohodimo bo hlalosa hore eo o re phahametse. Modimo e ka hlalosa tse lateleng:
• Ramasedi
Bala tlhaloso serapaneng se eteletseng sena pele bakeng sa tlhaloso.
• Bongwe ba Badimo
Badimo ke batho ba ileng boya batho, mme bao ka bona re fetisang mesarelo, ditsietsi le diteboho tsa rona ho Ramasedi. Bongwe ba badimo bo bitswa Modimo, e leng ho hlalosang motho ka mong ya arohetseng badimong.
• Motho
Sebupuwa se motho se ntseng se phela se bitswa modimo ho latela bomodimo ba sona. Mme sena se qaqile haholo tatellanong ya lelapa, e leng yona tshiya ya setjhaba. Ntate le Mme, batswadi, mmoho ke medimo ya bana. Bongwe bona ba medimo ke modimo.
• Medimo
E re ka ha motswadi ka mong e le modimo wa ngwana, batswadi le baholo ba hae ba ntseng ba phela ba bitswa medimo ka kopanelo. Ke ka hona ngwana mosotho a tlotlang le ho hlompha batswadi le baholo ba hae ka mehla.

Setho ke tumelo ya mosotho ho mmopi wa hae. Motho ke sebupuwa sa mmopi se phethahatsang setho. Athe botho bona ke dikateng tsa bophelo ba mosotho tse fupereng boitshwaro, tlhompho le dikamano pakeng tsa batho. Batho ke bongata ba motho.

Bothata bo hlahile ho fihleng ha makgowa, ka ha ba kgeselletse fatshe sohle se amanang le bophelo ba mosotho. Ke mona moo mabitso le dipolelo tse nyenyefatsang di qadileng ho ba teng mabapi le tumelo tsa batho. Ho latela tumelo le moetlo wa makgowa, mang kapa mang ya sa dumeleng ho latela bodumedi ba bona o bitswa mohetene. Mme lena ke lentswe le hlapaolang hobane le hlalosa ya sa tsebeng modimo.

Motebo o hlongwa moo ho nang le makgulo a matle bakeng sa mehlape. Madingwana a tla motseng ho tla hlwela feela. Ba phela motebong ha feela e sa le badisa.

• Tlholeho:
Mosotho wa pele o bitohile lehlakeng mme mosotho eo o bitswa Mosito.
• Sedimo:
Sedimo ke lenane tatello la modimo. Sedimo sa rona se eme tjena: Ramasedi, Badimo, Modimo ho phetele ka Medimo.
• Kgwetsa:
Ngwana mosotho o rweswa kgwetsa ha a ntshuwa ntlung.
• Sebe:
Dimpe tsa lefatshe di ahlolwa motho a sa phela mme kotlo ya tsona o shebana letsona lefatsheng. Sena se etsahala ka tsela tse fapaneng, empa e re bakeng sa tlhakisetso ena ke re motho o welwa ke bomadimabe kapa yona kotlo ya lefu. Ebile motho ya soto ha a tlutluwe le mohla a orohetseng badimong.
• Thapelo:
Mosotho o etsa thapedi ka polelo tsa hae e seng ka seratswana qotso. Sena se hlalosa hore thapelo ya mosotho e polelong tsa hae.
• Ntlo ya Thapelo:
Mosotho ha a na ntlo ya thapelo, ka ha thapelo ya mosotho e diketsong le dipolelong tsa hae.
• Matsatsi a Thapelo:
Ha ho na matsatsi a kgethehileng a thapelo sesothong. Meetlo ya mosotho ke diketsahalo tse kgethehileng tseo ho tsona ho fanwang ka tlhompho ho modimo le badimo.
• Bophelo ka Mora Lefu:
Basotho bohle ba orohela badimong mohla ba hlokahalang.